Penguji besai bulan Oktober 2021

Karang tu ditulis aku kena malam 29 Oktober 2021 jam 11:00 malam.

Bulan tu naka pemesai penguji ngagai kami sebilik, ditinggal indai dikesayau. Naka pemuang asai. Aku ga kena kuarantin ba hotel pengudah ditemu positif Covid 19 kena 21 / 10 / 2021. Temu nadai ulih nyium utai. Tang aku suman, kena ari siti muak ka lemai 22 / 10 / 2021 . Puji Tuhan...

Sida ba blok seberai

Pejam enchelak, gali, duduk, makai, tinduk, meda tv, mandi, berandau enggau kaban sebilik ba Hotel seberai padang bilun Kuching. Nya mih pengawa ninting ari. Ka ngereja pengawa bukai, deka ngaga kereja radio, untak ga nadai manah pikir. Enggai nyadi magang pengawa...

Tu kisah iya.....Pengudah "swabtest" lalu ditetapka positif Covid 19, kena lemai 21 oktober 2021 nyin kemari, aku berengkah diasuh kuarantin nyentukka 30 haribulan, pagila.Pengirau serta penusah ati nadai alai nyema, bekenangka dini alai urang ngasuh aku diau, lalu enggau sapa...Agi ga ngena sida ti tinggal ba rumah, diri sebilik...

Sereta ba baruh hotel Raia, dia ati aku beteka-teki serta irau laban maia malik ke ringkat atas, dia aku tepeda mayuh bendar orang segulai bilik dalam siti bilik baka dewan. Dalam ati bejaku kediri "badi mih aku diasuh begulai enggau orang mayuh nya lagi..." Ko anak ati bejaku kediri.

Peda aku jam ba telefon, nyau ka setengah jam tudah diri udah duduk dugau-dugau ba bangku plastik ngimbai tiang semin hotel bechura kelabu

Tu mih gaya malam ari, meda ,movie

Angin bepuput lemai nya ngasuh ati aku majak sinu ngenang nasit diri, udah aruk dipukung alung, udah ga labuh dipanggung lesung. Bendar mih nguji ngeringka ati diri enggau sampi serta peransang bala kaban, bala pangan. Hmmm...nyau kelama-lama runding melayang , amai pan mata tebuka tang runding ke bukai maia nya.

Dia aku sedar ari igau bai pengudah tepeda ka siku lelaki bebaju burak ,baju biru baka baju kena orang niki ke bulan ( bala frintliners ari opis pengerai ) ngepai aku.

Japai aku beg chura chelum ti dibai aku nuju bangku endur iya ngasuh aku duduk. Dia penerang serta dokumen dipinta sida.

Udah nya diasuh iya nganti enda lama laban sida nganti siku agi orang sebilik enggau aku. Lantang mimit seput lebuh nya ninga iya madah baka nya.

"Hasshh...kati meh tu lagi. Sapa mih sebilik enggau aku, enti orang nya enda tentu berapa bakani mih chara ngabiska jam, ngitung ari nyentukka abis kuarantin 10 hari ..." Nya ko sebana dalam ati maya nya.

Bisi mih 10 minit udah nya, ari jauh aku tepeda ka siku nembiak lelaki, lebih kurang 23 taun umur iya mansang kia bebaika beg chelum, bebinchingka kutak siti. Dalam ati din bejaku kediri nguji nyangka, "kada enda nya sebilik enggau aku lagi..." ko ah.

Check oksigen enggau pengangat isi setiap ari. Bakatu mih ya betusun engggau orang bukai

Ngam-ngam nembiak nya diasuh sida KKM sebilik enggau aku, lalu kami duai diasuh mai kunci . Bilik endur kami duai uchak nya belumur 332, lalu dalam pejalai nuju lif enggau bilik, sempat bekelala betanya nama pangan diri, lalu iya madahka nama diri Kelana, bansa melayu ari Kampung Pulo, seberai Waterfront Kuching. Nasit bendar uchak nya pejaku, lalu iya mega siku nembiak ti enda tinggal sembiang.

Mayuh macham mih utai dikenang tudah tuai sekumbang sebilik maya kuarantin. Bisi nya ngenang sekula tudah kelia, ngenang ambai iya, ngenang pasal kereja meh nya jara enggau utai bukai kena ngemandakka ari.