Kisah Idup Maxwel Franklin Saran @ Ijau - Bahasa Iban

PROFAIL MAXWEL FRANKLIN SARAN

Maxwel Franklin Saran

Enggau baruh ati, aku ngelalu ka kita ti ngelawa blogspot tu enggau basa. Blog tu ditengkebang kena nganti website lama aku suba ti enda dikena agi.

Ditu endur ngenang pejalai diri, pia mega nyadi diari, ngenang menua, diri sebilik, pengingat begulai enggau bala kaban serta orang mayuh.

Menua kami, sepiak aba - Langgir 

Menua kami, sepiak aba - Langgir . Ba baruh Bukit Lingga ( Gunung Lesung )

Bisi sekeda lama udah ngelala, bisi sekeda engka baru ngelala tudah diri. Nama aku Maxwel Ak. Saran. Kenyau udah nujah dunya pemerindang ari taun 1999,  ngena nama Maxwel Franklin Saran, ngambi mimit nama apai aku Franklin Saran. 

Tu gaya sungai Strap sebedau mudik sungai mit Langgir

 Kami sebilik ngaangau ka aku nama Ijau. Penatai asal ari menua bagi kedua Sri Aman, Sarawak iya nya Langgir, Lingga ( Sepiak apai ). Indai aku orang Munggu Sawa, Pantu.

Gambar kami menyadi enggau petunggal, ba Langgir

Ada ba Banting, lebuh apai ngajar dia suba maya taun 1981.Anak kedua ari 4 diri menyadi. Menyadi tuai benama Angelina, nama kangau iya Umang, nangkan aku Clement, dikangau kami sebilik Indap, lalu menyadi bunsu kami benama Steven, dikangau kami nama Lipik. 

Aba...lebuh kami ke Langgir

Enti nunda, kami menyadi bisi lima iku, tang siku ke tuai suba nangkan ka Angelina benama Donny Dabong dulu ninggal ka dunya maya umur iya setaun lebuh apai aku agi ngajar di Banting.

Ba Banting, enda nemu taun berapa tu

Udah beruang bilik, lalu ngentap ka pendiau diri ba Kuching. Taja pan idup ba nengeri, tang pengerindu sereta pengelengau ke menua tetap enda ulih dibuai. 

Gunung Lesung @ Bukit Lingga. Ba baruh bukit nya mih menua kami

Wong Bukit Lingga. Ba kebun aba di Langgir

Siku- siku kitai mensia ngembuan pengingat pait serta pengingat manis ti meruan dikenang, iya ti ngasuh kitai asai ti deka ka jeman nya ditikal pulai baru.

Maya pulai Gawai ke Langgir, enda ingat taun berapa tu. 

Bebatak. Tu meh baka enti ai sungai langkang ( Sunga Langgir )

Suba…laban nitih ka pengawa apai nyadi pengajar mindah kin kia, kami menyadi, suah beserara enggau pangan diri. Bisi ti nitihka apai mindah kin kia ngagai sekula bukai, bisi ti diibun niang ini ba Lingga.

Kami duai Indap ba Pasar Sri Aman

Lebuh maya sekula primari, kala sekula ba ulu Sebuyau iya nya SRK. Pendawan. Penyauh menua nya dua jam lebih ngejang ka pasar Sebuyau ngena perau. Maya nya apai aku sigi udah nyadi kepala pengajar. Lebuh maya nadai penanggul serantau sungai, sigi lanchar meh pejalai. Tang enti maya bisi penekul baka injin rusak, mayuh kupar ( reba ) kayu enggau kumpai betekat ba sungai, sigi lama endur ngenataika diri ari Pendawan nuju Sebuyau tauka Sebuyau nuju Pendawan. Maya di Pendawan, aba ngajar din pengelama 10 taun.

Enggau Mak..Bediri sepiak kanan nya, petunggal aku Milly ( Ba Pendawan, Ulu Sebuyau )

 Enda ingat, taun berapa … Taja menua nya jauh ba ulu Sebuyau, dia mayuh bala kaban belayan di menua nya datai ari sitak Sri Aman.

Ba Pendawan

 Lama diseraka seraka menua ngelama tu, diatu seninjik bendar agi ulih nyidi, begiga serta agi ulih begulai betundi enggau bala kaban ari Pendawan.

Ngintu hari pengada ba Pendawan

Sida ke agi dikingat lebuh kami duai menyadi aku Clement begulai ba Pendawan suba, begulai betaut, begulai nginti, bemain ba sungai, mansai, nubai, nyauk, nyagam, nyarin, nani bubu,betaut…enggau ke bukai, benama Bujang, Jakup, Kelly, Endu Lipun, niang Judy, Rickie, Ital enggau…eh..enda ingat agi…haha!!

Dua sebuat...haha

Penyauh sekula ari rumah endur diau asai-asai aku bisi sejam lebih endur kami bejalai kaki tiap hari, nengah madang getah, mansa paya..mansa emperan, niki bukit nurun bukit..nya baru datai ba sekula.

Birthday di Pendawan

Dia endur belajar ka pengidup, laban ukai baka orang ti besekula ba sebelah pasar sebelah nengeri besai. Jauh ka agi bisi ninga rengung mutusikal, meda kerita mansa kin kia.

Rumah pengajar

 Luba nya meda sida lutung sida kera bejelangkit enda jauh ari sekula nya kelia laban sekula nya ditumbuhka entara dua menua, Pendawan enggau Kpg. Pelaie. Dalam pejalai pulai ari sekula, sempat
begiga ka baur ginti kena nginti lemai ari.

Sungai ari Sebuyau - Pendawan

Sambil bejalai pulai ari sekula, sempat matah kubuk matah miding, pama meh bisi ke lauk lemai hari. Nama pengajar ti agi dikingat maya nya, Cikgu Gindi, Cikgu Jarau...

Sungai tu endur kami suah bemain kelia. Sungai Pendawan

Di menua nya mega mayuh pekara pengidup dipelajar ka taja umur agi mit..

Kami duai Clement udah nemu bebai ka injin sepit 20 kuda, nemu berikan Kediri nani taut, nani pukat, enggau orang nyiruk , diulu ka apai nimbak jelu ke kampung enggau mayuh agi ke bukai.

Tu ba ai wong terusur bukit Lingga ba menua indai aku, Munggu Sawa. Gambar tu diambi maya pulai Gawai begulai enggau bala petunggal enggau bala anak buah

Tu ba ai wong terusur bukit Lingga ba menua indai aku, Munggu Sawa. Gambar tu diambi maya pulai Gawai begulai enggau bala petunggal enggau bala anak buah

Tu ba ai wong terusur bukit Lingga ba menua indai aku, Munggu Sawa. Gambar tu diambi maya pulai Gawai begulai enggau bala petunggal enggau bala anak buah

Tu ba ai wong terusur bukit Lingga ba menua indai aku, Munggu Sawa. Gambar tu diambi maya pulai Gawai begulai enggau bala petunggal enggau bala anak buah

Tu ba ai wong terusur bukit Lingga ba menua indai aku, Munggu Sawa. Gambar tu diambi maya pulai Gawai begulai enggau bala petunggal enggau bala anak buah

Tu ba ai wong terusur bukit Lingga ba menua indai aku, Munggu Sawa. Gambar tu diambi maya pulai Gawai begulai enggau bala petunggal enggau bala anak buah

Munggu Sawa, Pantu Sri Aman

Lebuh ba Pendawan, Steven ( lipik ) enggau Angelina ( umang ) besekula ba SRB. Chung Hua Lingga. Seduai iya diibun niang ini ba belakang pasar Lingga. Lebuh kemisi ujung taun enggau Gawai baru kami menyadi begulai, pulai ke Langgir tauka Munggu Sawa. Luba nya kami pulai ke Kuching laban apai udah meli rumah maya nya di Tabuan Jaya, rumah ti endur kami diau diatu.

Kepuas pindah kin kia sekula, nyau enda ingat agi ni maya, taun berapa sekula ba siti-siti menua. Kami duai Clement mega kala sekula, diau ba asrama SMK. Simanggang lebuh pom 1 ( taun 1995 ) Maya ujung minggu, dua minggu sekali baru pulai ke Lingga. Ukai nyamai jauh ari urang tuai maya nya. Dia kami besekula enggau bala nembiak ari Tanjung ijat, Gran Stumbin, Maludam, Seduku enggau ari menua kami empu, Munggu Sawa enggau Langgir. Rambau nya aku dipilih nyadi Pengawas asrama, lalu kaban rapat kami duai iya benama Wong Siew Ing, ukai orang bukai ga nya. Bala kami empu ari Seduku Lingga. Diatu iya udah nyadi Polis. Kaban bukai ti dikengat aku baka sida janggu, Lawrence, Langi Kanang enggau bala bukai bela diau ba buding ( asrama kuning )

Ngenang pengingat di buding SMK. Simanggang, kami kala kena ukum pengajar warden jaga malam iya nya Cikgu Ahmad ( enti enda silap aku ) leban kelalu inggar betundi serta chapuh malam hari. Kami diasuh iya ngumpul sampah maya tengah malam. Ba asrama nya mega, mayuh cherita ti nyadi ba kami sebuat nyengkaum kala tedinga ka utai ti nyelaie-nyelaie, tambah agi kami maya nya benung tatau "bemain ngangauka semengat antu". Engka bala sida ti ampit sekula enggau aku sama seasrama bisi tebacha ke karang tu, tentu sida agi ingat kisah nya lebuh selalu bemain "spirit". Anang main-main enggau utai nya laban nya amai-amai nyadi. Nya pan bepanggai ba pengarap siku-siku.

10 taun pengudah apai aku ngajar ba Pendawan, kami besekula ba SRK. Lela Pahlawan Lingga, nangkan ka nya lalu pindah ngagai sekula primari St. Michael Entingan endur aba ngajar ( Nadai gambar ditu. Bisi maya nepu ) Ba sekula St. Michael nya, aba nyadi Kepala Pengajar dia. Tang kami menyadi sekula ba endur bukai laban penanggul nadai sama kelas. Kami tiga menyadi, Indap, Lipik enggau aku sekula ba SRK. Jalan Muara Tuang, sekula enda jauh ari Bukit Berangan nuju ngagai Batu 7 enti ari Samarahan. Menyadi kami ke indu, Umang agi sekula ba Vokasional Betong rambau nya. 

Pama diri penyauh sekula endur kami tiga ari Entingan. Maya nya suba, jalai raya ukai baka ti diatu, agi bebatu-batu. Besepuk mua laban debu lori nyema bejalai kaki pulai sekula ketegal nadai bas agi. Semina disinggah bas ba simpang jalai aja .Kami selalu bejalai kaki ari simpang jalai besai ( roundabout  Samarahan UITM ti diatu ) nuju Entingan.

Lebuh pagi hari, urung pukul 4.00 ngagai 5.00 pagi, udah berengkah mak nyendiaka utai pakai kami menyadi ti deka nurun sekula serta nyediaka utai pakai aba ti deka nurun ngajar. Sebedau enchelak mata panas, deka terebak tawas pukul 5.30 pagi, kami endang udah bediri ba simpang jalai ngimbai dewan Entingan nganti bas ti dikena maya nya dibai siku apai tuai Cina, bas belumur 10B. 

Nyau bekeduyun bala orang bukai bela beanti ka bas, dia mih bela besekut dalam bas nya tiap kali nurun ke sekula laban bas nya mansa menua bukai baka Kampung Nangka, Kampung Pinang enggau endur bukai ti nadai jauh ari Entingan.

Maya ba Entigan, kala mega dibai aba enggau bala iya ti bukai begiga ka ikan, nyala undang ba sesebelah sungai Entingan serta Kampung Nangka lebuh ujung minggu. Bulan besilih ganti, jam betukar enda berasai....mayuh peneleba diasai, dia mega sekula endur aba aku pinchin nyadi pengajar. Lebuh ngerami iya pinchin, naka pengerami disekula nya tanda basa bala komiti sekula ngagai iya, nyau kunsit ba padang sekula ngambi sida Band Maya. Lebuh maya nya suba, lagu Band nya chukup tebilang diberi nama Chemuru Ati.

Takah berapa bulan udah nya, enda mukai-mukai aba nerima kangau ari opis pelajar ngasuh iya ngajar baru laban lebuh nya kurang pengajar Bahasa Inggeris. Iya diasuh ngajar di ulu Kapit ba sekula SRK. Nanga Metah, enda jauh ari Nanga Merit . Kami menyadi pan ampit besekula di menua nya.

Penyangkai ekspress Kapit

Umbas di tat pemedis isi ngenataika diri ke menua nya, genap sehari baru sangkai. Lebuh ke Nanga Metah, sepemanjai sungai, ulih meda pemanah rampa menua nisi sungai rajang. Dia kitai bisi mansa mayuh rumah panjai kita Iban. Udah nya mansa siti wong ti tebilang, naka peneras iya nya Wong Pelagus.

Tu gaya ekspress benung mansa Wong Pelagus.

Deka nuju ke Nanga Metah, bekena ka 3 buah ekspress, ari Kuching nuju Sibu, udahnya ngena ekspress siti agi ari Sibu nuju Kapit. Ari Kapit nuju Nanga Metah ngena siti agi ekspress laban ekspress ari Kapit nya ukai semina nuju Nanga Metah aja, tang bisi mega nuju menua bukai ke ulu Belaga.

 Dia kami besekula enggau bansa Iban enggau bisi mega menyadi kitai bansa Beketan. Sekula nya ulih dipeda ari Sungai Rajang, seperis mansa ari ulu enggau ari ili pan ulih mega dipeda ari rumah pengajar.

 Wong Pelagus ari atas

Nyau ka tiap lemai kami mandi ba sungai Rajang ( Nanga Metah ). Naka pengerindu ati...sambil nyemerai, rindu bemain ba sungai dipangka umbak kapal, umbak tungkang ti mansa. Di Nanga Metah, bisi kala dibai sida aba begiga jelu babas, pia mega berikan ngagai Nanga Merit. 

Wong Pelagus. Gambar tu diambi maya aku belagu ke Sekula Nanga Merit

Siku nembiak ti agi dikeingat aku lebuh nya, benama Nadarajan ak. Sintau, nyau ka serebak enggau kami menyadi . Sida sebilik diau berimbai enggau kami ba kuarters pengajar. Dia ampit mimit belajar jaku bansa Beketan enggau iya...baka jaku ngirup ai ( miup danum ) eih...nya aja ti agi dikeingat aku..haha!! Ke bukai enda ingat agi.

Ka meda rampa menua sekula Nanga Metah? Peda ba channel unggal tu ba youtube Kilat Snonie Nading. 

Tekan link sepiak kanan tu    :  Rampa sekula Nanga Metah Kapit

Lebuh lemai hari, mayuh macham pengawa ti digaga bala pengajar, tang ke suah agi dipeda sida bemain badminton ba sekula nya. Takah berapa bulan, kami lalu mindah ke Kuching ...Lebuh nya, agi aku ingat mimit maya kami ti mindah nya ngena ekspress benama Campur-campur. Gelumbang  mangka naka pemesai pengudah ngejangka Kuala Rajang ngagai Kuching laban maya nya endang musin landas. Nadai nyangka diri agi ulih idup meda gelumbang naka pemesai nya. 

Pinchin meh aba maya nya, lalu kami diau di Kuching. Iya meli sebuah agi rumah ba Taman Malihah di Matang. Kelia, jalai nuju Taman Malihah ukai nya baka diatu, agi belubang-lubang. 

Diatu Taman Malihah udah nambah mansang jauh ubah ari kelia maya kami datai dia. Lebuh nya taun 1995. Kami berimbai rumah enggau orang ti chukup manah enggau begulai. Sepiak kiba, bansa Bidayuh, lalu sepiak kanan bansa Melayu. Takah berapa taun udah nya, baru kitai Iban diau ba rumah sepiak iya nya uchu Temenggong Jugah kelia dititah kami nama " Uncle Mek". 

Rumah ba Taman Malihah suba

Rumah ba Taman Malihah suba

Nama kebendar iya Lawrence.  Sepiak kiba, kaban kitai Bidayuh, dikangau kami nma Mak Santi. Laki iya benama Julia. 

Kami chukup rapat enggau sida, nyau asai diri semenua, lalu enda rawan enggau pangan diri. Ba Taman Malihah baru kami sebilik begelumu begulai. Menyadi kami ke indu, Angelina pan udah enggau kami sebilik laban udah tembu sekula ba Vokasional Betong.

Enggau aba, bala ika, ipar, yak

Enggau aba, bala ika, ipar, yak

Kami duai Clement ( Indap ) besekula ba SMK. Matag Hilir, sekula sekondari pom 1 ngagai pom 3. Menyadi kami ti biak, Steven sekula ba sekula cina Sejijak, nuju ngagai Kampung Paroh, semak simpang Taman Malihah.

Ging pala gundul

Taman Malihah

Penemuai bala petunggal ngagai kami ba Taman Malihah suba

Lebuh begelumu enggau bala Band Boy di rumah Malihah. Siga baka, selalu padat bakatu maya nya suba.

Lebuh ba Taman Malihah, kami bejalai kaki nurun ke sekula, urung 20 minit pejalai ari rumah. Ba SMK. Matang Hilir, aku aktif eggau mayuh macham bengkah main enggau aktiviti baka main bul , belanda enggau ti bukai.

Pom 4 enggau 5, aku besekula ba SMK. petra Jaya, ngena bas setiap hari. Dia aku balat aktif enggau mayuh macham aktiviti, lebih agi Persatuan silat enggau badminton. Dia aku dipilih nyadi Naib Pengerusi kelab silat di SMK. Petra Jaya dua taun bejurut, lalu kala mega enggau betanding ngelaban sekula bukai. Sigi baka, maya sekula kelia mayuh macham utai deka diuji ngambi ka pengingat dudi hari.

Eh,,baka nembiak sekula bukai mega, mayuh pengingat manis enggau pait ti disepi, tang enda ulih dicherita magang. Lebuh ba bangku sekula SMK. Petra Jaya, aku endang udah berengkah rindu ke pengawa belagu laban suah begulai enggau sida Andrew Bonny James Ivy Ubang, Ferron Giang Ram Ringgit. Belabuh ari nya, aku berengkah nguji merani ka diri nyingkang ngagai dunya pemerindang asil ari peransang sida, ditambahka agi peransang serta sukung kami sebilik . Pia mega bala kaban ti bukai ti begulai besari-sari bela nyukung baka James Jacob ( bela bedau nyadi artis maya nya ) Edwin Nanggah. Lebuh nya iya bedau gawa ba RTM, lalu aku mega bedau nyadi penanyi .

Ujung minggu, aku mega kala Jogging enggau Jennarino Jeraki ba sesebelah Taman Malihah. Iya sigi udah nyadi penanyi enggau Golden Pearl maya nya lalu sigi udah jadi ke aunty Jenny. Nya mih pengawa maya ujung minggu, nyau ambis digagai ukui juging tumu pagi. Pia mega, kami sida menyadi aku selalu enggau bala bukai bemain bul ba padang bekau sungkur lipan ba perumahan Fasa 1. Kami bemain bul nyau ka ninting lemai. 

Kaban ti enggau begulai maya nya, Eddie Eait, Jonathan, Sylvesten Martin, Joe, Jonathan, Kutin, Joshua Salih, Awang, Tad Augustine, Ambros, Bui Rak, Suntat enggau ti bukai.

Beundan-undan mih kami duai Indap ngena basikal ninting lemai nuju padang main bul enggau kaban bukai. Nyampau mih bisi mutusikal baka ging bukai, iya ga maya nya agi nembiak sekula. Sambil ngena basikal, sambil nya mega ngesan radio, masang lagu ngena kisit nuju padang bul kena merindang ati. Lagu ti tebilang rambau nya, Bujang Paku Lawang, Buah Peram-peram, Buah ati Dirampas Orang, Nuan Semina Beduan, Endena...enggau mayuh agi lagu bukai. Menyadi kami Steven tinggal ba rumah laban iya bedau tentu besai rambau nya.

Cherita jeman di Malihah mayuh bendar kebendar iya. Ni ke ngasuh sinu, ngasuh rindu, geli ati enggau mayuh macham agi. Au, ngenang pengawa belagu, ditu aku nusi ke kita...lebuh pom lima ba SMK. Petra Jaya, aku endang udah berengkah nyadi recording artis Golden Pearl Recording Studio, diambi sida Jennarino enggau Jenny Tan nyadi penanyi sida, serambau enggau Betty. Kami duai Betty betemu suba lebuh ba studio GPRS agi ba Jalai Petanak, enti enda silap aku maya malam ari jam 8.00 malam . Dia meh aku ngelala Betty Bawing, enggau pemuzik Golden Pearl tebilang maya nya Ramsay Owen. Malam nya Betty recording lagu Pengerindu alang-alang.

Ka nemu kisah bukai ? Ila aku nampung baru ngenang pejalai aku nujah unak duri, nyepi pait manis berengkah ari nyingkang nyadi siku pemerindang baka ke diatu.Agi mayuh pekara patut dipelajar....

Pesan aku, anang ngemegah diri betempik dada ngumbai diri tebilang. Ingat ka kaban lama.... Manah nitihka resemi padi, majak perisi majak ngemaruhka diri. Karang tu dikena aku ngelimpang runding aku benung kuarantin di Hotel . Tu masuk ari ke 7 udah bekurung ketegal penyakit Covid.  Blogspot tu kebendar iya lama udah bisi digaga aku, semina ngelama tu enda dikerembaika aku. Nya alai tu endur aku becherita pengawa lama, kisah jalai pengidup serta bekunsi penusah enggau kita pengudah ditinggal indai kami ti dikesayau, chukup mentas serta siru. Indai ti kami puji...Ensih ak. Tibu. Minta kitai bela besampi ke semengat iya...

( Kisah tu deka ditampung aku ba maya ti bukai...)